ភ្នំពេញ៖ ក្នុងខែមករា ឆ្នាំ២០២៣នេះ អគ្គនាយកដ្ឋានពន្ធដារបានប្រមូលពន្ធ អាករគ្រប់ប្រភេទបានចំនួនប្រមាណ ៣០០លានដុល្លារ ស្មើនឹង៨,៤២ភាគរយនៃផែនការច្បាប់ស្តីពី «ហិរញ្ញវត្ថុសម្រាប់ការគ្រប់គ្រងឆ្នាំ២០២៣»។

តាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ ចំណូលពន្ធដែលប្រមូលបានប្រចាំខែមករានេះ បើធៀបនឹងចំណូលពន្ធប្រចាំខែធ្នូ ឆ្នាំ២០២២ គឺកើនឡើងចំនួន ១២,៣៦លានដុល្លារ ស្មើនឹង ៤,២៩ភាគរយ។

អគ្គនាយកដ្ឋានពន្ធដារ បានបញ្ជាក់ថា ក្នុងខែមករា ឆ្នាំ២០២៣ ចំណូលពីប្រភេទពន្ធសំខាន់ៗបានរក្សាកំណើនធៀបនឹងរយៈពេលដូចគ្នាក្នុងឆ្នាំ២០២២ ក្នុងនោះពន្ធលើប្រាក់ចំណូល ២០,៧៣ភាគរយ អាករលើតម្លៃបន្ថែម ៨,៥៧ភាគរយ និងពន្ធលើប្រាក់បៀវត្ស ១៨,០៧ភាគរយ។

អគ្គនាយកដ្ឋានពន្ធដារនឹងបន្តពង្រឹងការផ្សព្វផ្សាយ និងអនុវត្តការគ្រប់គ្រងប្រមូលចំណូលពន្ធពីវិស័យល្បែង និងកាស៊ីណូ។ បន្តអនុវត្តវិធានការទារបំណុលពន្ធតាមនីតិវិធីជាធរមាន ចំពោះសហគ្រាសដែលជំពាក់បំណុលពន្ធ ហើយមិនបានចូលខ្លួនមកទូទាត់ឬដោះស្រាយឱ្យបានត្រឹមត្រូវ។

ជាមួយគ្នានេះ ពន្ធដារនឹងបន្តអនុវត្តវិធានការចុះអង្កេតសហគ្រាសតាមដងផ្លូវ និងវិធានការចុះអង្កេតអចលនទ្រព្យ និងបន្តពង្រឹង និងពង្រីកវិសាលភាពអនុវត្តយន្តការបោះពុម្ពវិក្កយបត្រពន្ធលើអចលនទ្រព្យ និងពន្ធលើដីធ្លីមិនបានប្រើប្រាស់ និងចែកជូនដល់គេហដ្ឋានរបស់អ្នកជាប់ពន្ធឱ្យបានដល់អ្នកជាប់ពន្ធទាំងអស់៕